A marca Azul de Portosín, distintivo impulsado pola Confraría de Pescadores San Andrés, está este sábado 23 de celebración, achegando a veciños e visitantes unha completa xornada de exaltacións gastronómicas e culturais para todas as idades.
Na vertente gastronómica a xornada incluirá, no porto de Portosín, unha demostración ás 12.30 horas a cargo de membros da Asociación de Cociñeiros da Ría da Estrela, que darán forma a un “menú Azul de Portosín” cos catro principais peixes da marca: sardiña, xurelo, xarda e bocareu (anchoa), ao que se suma a empanada de sardiña. Haberá sorteos entre os participantes.
Ás 12.45 celebrarase a presentación e degustación da conserva Azul de Portosín e ás 13.00 horas farase unha homenaxe póstuma a José Blanco Agraso trala súa adicación e contribución ao sector pesqueiro. Ás 13.30 horas está previsto un monólogo co humorista galego Pepo Suevos, que porá o toque de humor á degustación.
Pola noite será a quenda da música, co Festival Azul de Portosín. Actuarán (ás 21.00 horas) Denis Romero (Fuerza Vital), Flow del Norte (ás 22.00 horas), Los Limones (23.00 horas) e La Frontera (0.30 horas). A festa rematará con música das pasadas décadas e DJ Jalaiko.
A festa está organizada pola Confraría de Portosín co apoio da Xunta (Turismo de Galicia), o Concello de Porto do Son, Abanca e Sotavento.
