No marco do XVII Encontro de Embarcacións Tradicionais de Ribeira, a Asociación Ambar das Persoas con Diversidade Funcional estreou a súa nova creación teatral, Casas Refuxio, unha historia de mulleres libertarias, dirixida por Helena Salgueiro e interpretada polo grupo de artes escénicas ‘Elas’. A obra supón un paso máis na aposta decidida da entidade pola inclusión a través da arte, visibilizando o talento das persoas con diversidade funcional.
Tras o recoñecemento obtido con anteriores producións como As Paisaxes de Camille e A Serea Mariña, Elas regresou ós escenarios cunha proposta que vai máis aló da representación escénica: Casas Refuxio é unha homenaxe á resiliencia das mulleres e unha reivindicación da liberdade e do apoderamento. A acollida do público foi entusiasta, consolidando o papel da arte como ferramenta social transformadora.
Zeltia Iglesias, facilitadora do grupo, subliñou que “o noso obxectivo con Casas Refuxio e con todas as iniciativas do grupo ‘Elas’ vai moito máis alá do entretemento. Queremos poñer en valor o enorme potencial artístico das persoas con diversidade funcional e demostrar que unha inclusión real é posible en todos os ámbitos da sociedade”.
Con máis de 40 anos de traxectoria, a Asociación Ambar continúa promovendo vidas independentes en comunidade e conectando ás persoas cos recursos necesarios para que desenvolvan plenamente as súas capacidades e desexos. Desde a organización, expresaron o seu agradecemento ó Encontro de Embarcacións Tradicionais e ós asistentes pola súa implicación e apoio a unha visión inclusiva e diversa da cultura.
