Galicia continuará este sábado baixo os efectos do aire frío en altura, o que favorecerá a persistencia da inestabilidade atmosférica.
Durante a mañá agárdase moita nube baixa, especialmente na metade oeste do país, mentres que no leste haberá máis claros. Co avance do día, formaranse nubes de evolución que darán lugar a chuvascos localmente treboentos nas zonas do interior.
No litoral atlántico, as brétemas costeiras volverán facer acto de presenza ao longo da xornada, podendo reducir a visibilidade en puntos do litoral.
As temperaturas mínimas descenderán lixeiramente, mentres que as máximas experimentarán un leve ascenso respecto á xornada anterior(24graos). Os ventos soprarán en xeral frouxos, con compoñente oeste-suroeste.
Recoméndase precaución nas zonas interiores ante posibles treboadas e nas estradas costeiras pola presenza de néboas.
O domingo unha fronte pouco activa afectará a Galicia, deixando un aumento de nubes e algunhas precipitacións febles tipo orballo, máis probables pola mañá e canto máis ó oeste e ó norte.
Sábado:
O noso mar: Vento do noroeste á mañá, do oeste á tarde e do sur á noite, forza 1 a 2 á mañá, 2 a 3 á tarde e 1 a 3 á noite. Mar rizado á mañá e mar ovellado á tarde e á noite. Visibilidade mala á mañá, boa á tarde e regular á noite. Mar de fondo do noroeste á mañá e á tarde e oeste á noite, con ondas de 0 a 1 metros á mañá e á tarde e 0 a 0.5 metros á noite.
