A Policía Nacional detivo este mércores a outros seis homes pola pelexa multitudinaria ocorrida o pasado 1 de xullo en Ribeira, durante unha pedida de man no Centro Recreativo de Artes, e que se saldou cun falecido e varios feridos.
As novas detencións producíronse arredor das 11.00 horas no poboado da Conlleira, no marco dun amplo operativo policial. Segundo fontes policiais, os arrestados están acusados de participar nunha lea tumultuaria. Ademais, a un deles impútaselle un delito de homicidio en grao de tentativa e a outro, lesións graves. Todos os detidos permanecen na comisaría de Ribeira e está previsto que pasen a disposición xudicial o venres.
Doce detidos e prisión preventiva para un dos implicados
Con estes seis arrestos, elévase a doce o número total de persoas detidas polo caso. A semana pasada foron arrestados outros seis individuos en Santiago, entre eles catro homes e dúas mulleres, interceptados na peaxe da AP-9 cando se dirixían á capital galega, onde reside unha das familias implicadas.
Cinco deles quedaron en liberdade con cargos, mentres que o sexto foi enviado a prisión preventiva tras declarar o pasado 4 de xullo no Xulgado de Instrución número 2 de Ribeira. A este home, familiar da vítima mortal, atribúeselle a condución dun dos vehículos que o atropelou. Está acusado de homicidio (imprudente ou doloso), lesións con instrumento perigoso e atentado contra a autoridade. A xuíza tamén prohibiu a dous dos detidos en liberdade achegarse ao termo municipal de Ribeira.
A pelexa, tras unha celebración familiar
Os feitos remóntanse ao 1 de xullo, durante unha pedida de man celebrada no Centro Recreativo de Artes. A celebración rematou cunha pelexa masiva entre dúas familias, na que estiveron implicadas numerosas persoas.
Como consecuencia, un home perdeu a vida e varios resultaron feridos. Un dos feridos que permanecía hospitalizado recibiu a alta o pasado xoves. As forzas de seguridade reforzaron desde entón a vixilancia tanto na localidade como nos xulgados para evitar posibles represalias ou novos altercados.
