O Concello de Muros emitiu un comunicado no que reivindica (e lembra) a actividade do Centro de Información á Muller (CIM), servizo municipal ao que poden acudir as mulleres dunha forma segura, anónima e gratuíta.
No comunicado, que vén a raíz de “informacións de feitos dos que o Concello tivo coñecemento nestes días e que non podemos tolerar nin admitir”, recórdase á veciñanza que “en Muros contamos cos recursos necesarios para axudar e asesorar a calquera persoa que sufra unha agresión sexual ou calquera tipo de abuso físico ou psicolóxico”. E engaden: Ningunha persoa debe permanecer calada ante un feito así”.
O Centro de Información á Muller (CIM) de Muros está na rúa Rosalía de Castro, 30. Aberto en horario de 08:00 a 14:00 horas de luns a venres. Teléfono 981 76 24 65.
O centro atende as dificultades, necesidades e demandas das mulleres de Muros para facer valer os seus dereitos nos ámbitos persoal, profesional, social e familiar, cunha atención específica ás mulleres vítimas de violencia de xénero, ás que se lles presta axuda, asesoramento xurídico e atención psicolóxica.
