O Concello de Lousame celebrou nestes últimos días as festas de fin de curso dos seus Obradoiros da Memoria, unha actividade gratuíta na que participan medio cento de veciños e veciñas maiores de 60 anos. Unhas festas que están tendo lugar nos respectivos locais sociais onde se imparte esta iniciativa: Sanguiñal, Aldeagrande, Cruído, Vilacoba e Escabia.
A alcaldesa de Lousame, Teresa Villaverde, animou aos maiores do municipio a sumarse a esta iniciativa xa que “o seu obxectivo é mellorar a súa calidade de vida a través de actividades coas que exercitan a súa mente, axudando a previr o deterioro cognitivo, e que tamén promoven a súa socialización, pois teñen un tempo para xuntarse coa veciñanza e recordar xuntos o que xa saben e seguir aprendendo cousas novas”.
Os Obradoiros de Memoria son unha iniciativa organizada polo Concello de Lousame en colaboración da Consellería de Política Social e Igualdade. Están abertos a todos os veciños e veciñas de Lousame maiores de 60 anos. A inscrición é totalmente de balde e pode facerse en calquera momento do ano nos Servizos Sociais de Lousame, chamando ao 981 820 494 ou por WhatsApp no 689 126 385.
