O Concello de Boiro saca a licitación o proxecto para a mellora dos accesos e servizos á praia de Mañóns. O importe da licitación é de 67.387 euros e as empresas interesadas poden presentar as súas ofertas ata o vindeiro 17 de xullo mediante a Plataforma de Contratación do Sector Público.
O obxecto destas actuacións que se pretenden levar a cabo é mellorar o firme e realizar un percorrido accesible e seguro á praia de Mañóns, así como canalizar as pluviais eliminando a infraestrutura de drenaxe que na actualidade xera problemas de seguridade viaria. Preténdese a renovación duns 180 metros da vía de acceso que ten un ancho de 8 metros, así como xerar dúas beiras de 5m de ancho a cada lado de chan compacto de area cemento para facilitar o estacionamento e accesibilidade á praia.
Para o pavimento empregarase mestura bituminosa en quente de 5cm de espesor con regos de adherencia entre capas; e para o percorrido accesible á praia executarase un sendeiro de pavimento natural nas beiras este e oeste, dun ancho medio de 5m.
Para levar a cabo esta actuación o Concello de Boiro conta cunha subvención da Deputación da Coruña mediante o Plan Único Concellos (POS+).
