Este domingo 22 de xuño celebrarase a sétima edición da Travesía a Nado Illa de Rúa, un evento xa consolidado no calendario deportivo galego, cun marcado carácter benéfico a favor da Asociación Contra o Cancro de Ribeira (ACCR).
Na presentación oficial participaron representantes do Concello, do Club Náutico de Ribeira e da ACCR. A presidenta da asociación, María José Carreira, destacou que as prazas para participar xa están cubertas, con 150 nadadores e nadadoras procedentes de toda Galicia e España, e que o evento segue a medrar cada ano.
A travesía, de 4.500 metros entre a Illa de Rúa e o Club Náutico, comezará ás 11:30 horas, tras o traslado en catamarán ás 10:45. A previsión meteorolóxica é favorable, cunha temperatura da auga entre os 17 e 18 graos.
Haberá trofeos para os tres primeiros postos masculino e feminino, ademais de premios especiais para o participante máis veterano e para quen bata o récord actual da proba: 55 minutos.
Este ano homenaxéase a Gloria Lijó, nadadora que comezou neste deporte aos 55 anos e representa o espírito de superación e paixón pola natación.
O alcalde Luís Pérez destacou a importancia desta travesía na proxección deportiva e solidaria de Ribeira, así como o papel activo da ACCR como entidade comprometida coa sociedade.
.
