O Concello de Boiro recibiu da Deputación da Coruña unha subvención por importe de 15.000 euros para financiar os gastos do persoal técnico do departamento municipal de Deportes durante o ano 2024. Segundo explicaron fontes do Goberno local, a finalidade desta subvención recibida é “axudar a sufragar os gastos derivados da contratación do persoal do departamento municipal de Deportes que se encarga de coordinar as actividades deportivas e de dinamización do deporte no municipio, elaborar proxectos de animación sociodeportiva, supervisar a posta a punto de instalacións e medios ou programar actividades físico-deportivas, entre outros cometidos”.
O Concello lembrou tamén que “Boiro conta cun importante tecido deportivo, con clubs de distintas modalidades e en diversas categorías” e que ademais do apoio aos clubs para a práctica deportiva, a Administración local conta con programas específicos como son as Escolas Deportivas Municipais e Veráns Deportivos, así como a organización de actividades de promoción do deporte como a Carreira Popular Mar de Boiro, a Festa da Bici ou a colaboración con clubs deportivos para o desenvolvemento de probas e campionatos.
O Departamento de Deportes do Concello de Boiro está situado no Edificio das Colonias de Praia Xardín e presta servizo de luns a venres en horario de 9.00 a 14.00 horas e luns a xoves 16.00 a 19.30 horas.
