Na mañá deste venres 14 de febreiro o Goberno local de Outes pasou revista á que será a primeira vivenda social municipal do concello.
Segundo explicaron os responsábeis do Executivo, esta actuación na vivenda do mestre da unitaria do Bosque foi financiada a través dunha subvención da Xunta de Galicia aprobada no 2022 co dobre obxectivo de manter e arranxar un inmóbel que “xa era propiedade do Concello” e que se prepara para o seu alugueiro á veciñanza máis nova ou que, obxectivamente, teña máis necesidade económica e a imposibilidade de ter unha vivenda.
O investimento total foi de 83.659,40€.
Neste mesmo sentido, o Goberno local deixou solicitada unha subvención para unha actuación semellante na vivenda do mestre da unitaria da Barriera, en Tarás.
O Concello explicou tamén que a ordenanza aprobada hai uns meses pola Corporación local porá a disposición esta vivenda nun futuro próximo con condicións claras e de xeito temporal sendo a duración do arrendamento de dous anos nun máximo prorrogábel de catro co obxectivo de, “cun prezo moi económico”, dar unha oportunidade de prosperidade ás familias ou persoas que a soliciten. “O Concello avanza, deste xeito, no mantemento de infraestruturas xa existentes abrindo un novo servizo moi necesario no noso concello”, explicaron o alcalde e o tenente de alcalde de Outes, Manolo González e Anxo Núñez.
