As Comunidades de montes desenvolven un importante labor social nos espazos rurais, ademais de ser unhas ferramentas comunitarias e veciñais fundamentais para afrontar a realización de diferentes melloras nas parroquias. Para iso necesítase realizar unha boa xestión e ademais implicar aos veciños nas diversas actividades sociais, comerciais, culturais ou de calquera outro tipo.
Os problemas tamén forman parte do funcionamento destas entidades e así a propia Comunidade de Montes en Man Común de Olveira está a sufrir e vivindo, desde hai algún tempo, un conflito como consecuencia do malestar por parte de numerosos comuneiros que demandan unha maior de transparencia e claridade na xestión e o escrutinio das contas anuais da entidade veciñal. Remitiron diversas circulares aos membros da xunta directiva, mesmo ás propias Consellería do Medio Rural e de Medio Ambiente da Xunta de Galicia en busca de aclaracións pero, ata o momento, obtiveron o silencio como resposta.
Este grupo de comuneiros, ante o sentimento de indefensión que padecen, decidiron acudir aos medios de comunicación, para denunciar publicamente o que eles consideran unha vulneración e incumprimento dos estatutos, da propia Lei de montes de Galicia e da pasividade mantida por parte dos responsables autonómicos, nesta materia. Atopáronse con que a televisión pública de Galicia, Televisión de Galicia (TVG), pechoulles as portas para poder expresarse con liberdade, ao parecer por directrices que partiron do máximo responsable do medio público.
A creación de locais socioculturais comunitarios; o proporcionar servizos á parroquia, dos que non dispón; o mantemento de acceso aos núcleos de poboación; a creación de zonas de esparexemento; a prevención dos lumes forestais así como a xeración de emprego e o desenvolvemento de actividades para a xestión dos seus recursos propios, son algunhas dos importantes labores que desenvolven as comunidades de montes de aí a importancia en manter unha implicación directa dos veciños e a transparencia na xestión, por parte dos seus órganos de dirección.
