A concelleira de Cultura de Ribeira, Antía Alberte, presentou os detalles da II Mostra de Mulleres Creadoras de Ribeira, unha iniciativa que na súa primeira edición, no mes de marzo do ano pasado, fíxose na honra de Carmina Romero, unha muller que viviu en Ribeira e que, segundo lembrou a edil, tentou compaxinar o seu pulo artístico coa vida de familia, cousa que lle provocaba frustración por non dar pintado todo o que se propuña pintar ao adicar boa parte do seu tempo aos coidados e aos traballos domésticos. “Traendo esta historia”, comentou a concelleira, “queremos reflectir e homenaxear as vidas desas mulleres que por avatares de xénero non lograron satisfacer as súas inquietudes culturais, xa que se viron obrigadas a antepoñer os coidados dos demais”.
Alberte salientou tamén o éxito de participación e repercusión da convocatoria do ano pasado (“foi unha exposición moi ben acollida da que incluso se imprimiu un catálogo”) e dixo que nesta edición darase prioridade ás mulleres que non puideron expoñer o ano pasado.
Desenvolverase Centro Cultural Lustres Rivas de Ribeira do 7 de marzo ao 9 de abril de 2025
Poderán participar calquera creadora que teña inquedanza por expoñer as súas obras artísticas de pintura, debuxo, gravado, fotografía, artesanía, escultura ou outras.
Fixarase un máximo dunha obra por persoa (a non ser que unha mesma obra veña composta por varias pezas tipo díptico, tríptico, etc). Seleccionaranse 30 participantes para que na sala a mostra estea ben distribuída e poidan figurar no catálogo (aínda que dependendo dos tamaños poden ser ata 35 obras/participante máximo).
O tamaño máximo das pezas non poderá superar 1,20×1,20 metros coa finalidade de que poidan garantirse ao menos as 30 participantes na exposición.
As interesadas teñen que enviar a documentación requirida (fotografía da peza con resolución de 600 ppp, título, autoría, técnica e tamaño, texto que faga alusión ao tema e unha pequena biografía) á conta de correo culturaefestexos@ribeira.gal ou entregar persoalmente no C.C. Lustres Rivas, dende o 30 de xaneiro ata o 14 de febreiro do 2025.
O catálogo será de formato cadrado (22 x 22 cm) e acompañará á inauguración da exposición o venres 7 de marzo ás 20:00 h.
