As inmediacións do campo de fútbol Agra da Filgueira de Louro serán o escenario o próximo 23 de febreiro do Campionato de Galicia de BTT (3 horas de resistencia), organizado polo Club Ciclista de Muros coa colaboración do Concello de Muros.
Haberá probas desde Cadete a Master 60 en categorías feminina e masculina. Inscricións abertas en www.fgalegaciclismo.es
“É un orgullo para Muros acoller esta proba, que é o resultado de gran traballo que fai desde hai anos o Club Ciclista de Muros”, sinalou o concelleiro de Deportes, Damián Torea, que aproveitou na presentación da proba para convidar á veciñanza “a asistir ao campionato para ver a espectacularidade da BTT”.
Pola súa banda, a alcaldesa de Muros, María Lago, destacou a importancia “de colaborar desde o concello cun deporte en auxe e cunha proba que fomenta o deporte feminino, contribuíndo ademais a dar a coñecer a contorna natural de Louro”. A rexedora confirmou que terán un papel importante para a realización da proba a Brigada de Obras do Concello de Muros, Protección Civil de Muros, Policía Local, GES e Garda Civil de Muros.
