O Día Internacional da Muller Traballadora tamén se celebrou entre libros, poñendo o foco nas posibilidades da literatura para tirar abaixo muros, estereotipos e ideas preconcibidas. A Biblioteca Municipal de Rianxo, co fin de asolagar os hábitos de lecturas das novas xeracións con exemplos de mulleres que “deron exemplo”, publicou na rede social Pinterest medio cento de lecturas en feminino para conmemorar a devandita xornada reivindicativa do 8 de marzo, a disposición das seareiras e seareiros da literatura xuvenil no concello rianxeiro.
Entre estas obras iluminadoras e cheas de achados atópanse as dúas entregas de Pioneiras, de Anair Rodríguez e Nuria Díaz, A vida secreta de María Mariño, de Fran Alonso, ou os Contos de Boas Noites para nenas rebeldes, unha apaixonante escolma biográfica dalgunhas das personalidades femininas máis sobranceiras do deporte, as aventuras, a investigación científica ou a loita polos dereitos humanos. Tamén están presentes Na casa da avoa, de Marta Dacosta, Las chicas son de Ciencias (25 científicas que cambiaron el mundo), de Irene Cívico e Sergio Parra, Creedme, de Christian Miller e Ken Armstrong, ou o clásico da literatura de todos os tempos: Pippi Mediaslongas, de Astrid Lindgren.
