O secretario xeral da Lingua, Valentín García, e a directora xeral de Xuventude, Lara Meneses, presentaron este venres 5 de decembro o programa de voluntariado lingüístico Queres falar? destinado a “promover o uso do galego entre a mocidade a través de conversas entre galegofalantes habituais e persoas que queiran mellorar a súas habilidades no idioma ou incorporalo de novo á súa fala”, explicaron, engadindo que esta iniciativa forma parte do plan de medidas elaborado ao abeiro do Pacto pola Lingua que o Goberno autonómico está a desenvolver coa implicación dos grupos parlamentarios e distintas institucións para incentivar a presenza social do idioma.
Valentín García reiterou que “a mocidade é un dos grupos de poboación principais nos que baseamos o plan de accións que temos en marcha para fomentar o uso da lingua”, ao que engadiu que “esta é unha boa mostra do traballo transversal entre distintos departamentos, tanto dentro da Consellería como con outras áreas da Xunta, a prol da lingua”.
Lara Meneses tamén fixo fincapé no “importante papel que podemos ter desde Xuventude no marco da campaña Saca a lingua que levas dentro impulsando o achegamento ao idioma desde a acción voluntaria”. Así, apuntou, “estamos especialmente involucrados coa dinamización lingüística por medio de propostas innovadoras e integradoras como son estes grupos de conversa que organizamos nos Espazos Xove”. É nestes centros, repartidos por varios puntos de Galicia (Incluídas as localidades de Noia e Vilagarcía), nos que se desenvolverá o programa, de maneira que os mozos e mozas teñan a posibilidade de practicar o galego durante dúas horas á semana con persoas galegofalantes, ao que se lle sumarán outras actividades complementarias.
Os representantes da Consellería de Cultura, Lingua e Xuventude, fixeron este anuncio coincidindo co Día internacional do Voluntariado, polo que quixeron resaltar “a achega que fan á sociedade en moi diferentes ámbitos os programas de voluntariado, como neste caso que supón un soporte importante para nosa lingua e a nosa cultura”.
