No marco do seu incansábel compromiso co progreso e o desenvolvemento de Ribeira, a Asociación de Empresarios local mantivo unha nova reunión de traballo co alcalde Luís Perez Barral na que se analizaron os temas que preocupan á patronal e que esta considera “prioritarios” Por exemplo o empeño de continuar o desenvolvemento do novo polígono industrial, “o cal vai chegando xa á conclusión de todos os trámites administrativos, quedando pendentes detalles para poder pasar á seguinte fase de licitación das obras e comezo das mesmas”, explicou o presidente da asociación, Francisco Martínez Gude
O presidente tamén recoñeceu que “para nós tamén vital importancia, tamén, que se materialice a variante de Ribeira”. Na xuntanza, lembraron que a día de hoxe estase a finalizar a primeira fase do proxecto e que, co obxectivo de que non se vexa paralizado, o Concello trasladou á Xunta de Galicia o requirimento para que adique os fondos necesarios que dean con continuidade ao proxecto na súa totalidade. A patronal felicitou ao Concello por este compromiso e púxose á disposición da Administración local para facerlle chegar á Xunta o desexo dos empresarios de que “esta obra tan necesaria leve a cabo coa máxima dilixencia”. Así mesmo abordáronse outros temas nos que tanto o Concello como os empresarios comparten interese en que se leven a cabo coas máximas “eficacia e celeridade”, por exemplo a cuestión do novo centro de saúde. O rexedor explicou que foron enviadas varias propostas de emprazamento aos técnicos do SERGAS e que o Goberno local “está á espera de comunicación e resposta ás súas propostas”.
