O festival Tolemias Hailas de A Creba recada 1.200 euros na súa primeira edición en Ribeira

10 Setembro 2024

A Asociación Saúde Mental A Creba realizou o pasado sábado 7 de setembro a primeira edición do festival solidario Tolemias Hailas, unha iniciativa na que se buscaba dar visibilidade a esta entidade, así como á saúde mental. Ao mesmo tempo, tivo unha marcada vertente solidaria, xa que serviu para recadar arredor de 1.200 euros que contribuirán a manter a actividade da dita asociación inclusiva do Barbanza.

O emprazamento escollido foi a praza ribeirense da Porta do Sol. Marcaban os reloxos as 12:30 horas cando Jota e Xanico, presidente e colaborador da Festa da Dorna, fixeron escachar a rir ao público, lanzando dardos de retranca contra quen se puxera a tiro, mesmo contra o persoal técnico da asociación organizadora ou as e os integrantes da Corporación Municipal presentes no acto.

Posteriormente, o polifacético Cándido Pazó deixou clara a súa profesionalidade cunha maxistral demostración de que continúa sendo un referente da narración oral galega e amosando o seu compromiso coa saúde mental, ofrecéndose a colaborar con este evento. O broche final foi a cargo do grupo The Orphans, un trío chegado desde a cidade compostelá e que coas súas notas deleitou ao público asistente.

A presentación do acto foi a cargo de dúas usuarias da entidade, interviron tamén José Ramón Girón, presidente de A Creba; Isabel Fernández, secretaria de A Creba e Francisco Suárez-Puerta, segundo tenente de alcalde e concelleiro de Festexos. Durante o acto estiveron presentes varios membros da corporación como Fernando Abraldes, concelleiro do Mar ou o primeiro edil, Luís Perez Barral.

Outros artigos

Publicidade

Revista en papel

Opinión

“Escoitar o vento”. Xosé Antonio López Silva

“Escoitar o vento”. Xosé Antonio López Silva

Cando a secretaria da Academia Sueca a chamou para comunicarlle a concesión do Nobel de Literatura, Anne Carson estaba en Islandia, segundo dixo, escoitando o vento. Aos setenta e seis anos, unha muller que viviu de ensinar grego antigo, traduciu a Safo e deulle nova...

O Barbanza
Resumo de privacidade

Esta web utiliza cookies para que podamos ofrecerche a mellor experiencia de usuario posible. A información das cookies almacénase no teu navegador e realiza funcións tales como recoñecerche cando volves á nosa web ou axudar ao noso equipo para comprender que seccións da web atopas máis interesantes e útiles.