O Bloque Nacionalista Galego de Pobra vén de facer pública unha queixa sobre o servizo de instalacións deportivas do concello e sobre o seu modelo de xestión. Segundo comunica a agrupación, o estado e a xestión das ditas infraestruturas é “deficiente e lamentábel”, xa que, nas súas palabras, “os arranxos que solucionarían esta problemática seguen sen executarse malia a dotación orzamentaria”. As críticas da agrupación, emitidas pola concelleira Amparo Cercedo, céntranse no Polideportivo Municipal da rúa Venecia e no Estadio da Alta.
Segundo explican, o arranxo das deficiencias do Polideportivo foron postas de manifesto en xuño de 2018 polo BNG local, que levou a pleno unha moción solicitando a reparación de elementos como o teito, a cuberta, os aseos ou a accesibilidade, petición que foi aprobada por unanimidade. Porén, a agrupación recalca que o impulso definitivo para os traballos segue sen darse, e que a “imposibilidade de utilizar o Polideportivo prexudica ao deporte de base e a toda a veciñanza”. O BNG lembra que “algo semellante acontece nas pistas deportivas do Castelo e no Estadio da Alta”.
