Este venres 14 de xuño inaugurouse na praza de España de Ribeira a quinta edición da Feira do Automóbil Híbrido e Eléctrico, unha cita impulsada e organizada pola Asociación de Empresarios local que non quixeron perder o alcalde de Ribeira Luís Pérez Barral, o director xeral de Planificación Enerxética e Minas, Pablo Fernández, o senador Manolo Ruíz, o presidente da patronal ribeirense, Francisco Martínez Gude, os tenentes de alcalde e concelleiros da Corporación Municipal no acto inaugural.
Ao redor dun centenar de vehículos danse cita desde hoxe e ata este domingo, día 16 de outubro, na praza de España, en Ribeira, na que tamén poderemos ver vehículos novos, con quilómetro 0 e de xerencia. A entrada ao recinto onde están expostos os vehículos é novamente gratuíta. Ademais, o horario é ininterrompido.
O alcalde ribeirense participou na inauguración da feira salientando “o esforzo e dedicación da Asociación de Empresarios”, a quen lle agradeceu especialmente polo seu incansábel labor e visión de futuro.
Pérez Barral convidou a percorrer as casetas, participar nas actividades e, sobre todo, a reflexionar sobre como “podemos contribuír a cambiar a mobilidade ao tempo de deixar un planeta máis sustentábel para as xeracións futuras”.
Tamén incidiu en que eventos como este, demostran o poder da colaboración institucional entre distintas administracións e empresas para dinamizar as rúas e comercios do municipio. “Dende o Concello imos apoiar iniciativas que xeren dinamismo económico e social”, engadiu.
Sorteo de 600 euros e dunha finde eléctrica
Nesta edición da campaña a patronal vai sortear 600€ en tarxetas regalo para gastar entre os concesionarios participantes entre todos os tíckets de compra dos establecementos asociados que se suban á web da asociación (www.empresariosriveira.com) e estean selados na Feira do Automóbil.
A maiores, sortearase unha “fin de semana eléctrica”, un sorteo dunha fin de semana cun vehículo eléctrico. Esta iniciativa será posíbel grazas á contribución das marcas participantes.
Participan as seguintes marcas (un total de catorce): Opel, Jeep, Fiat, Citroën, Peugeot, Audi, BMW, Toyota (Compostela Móvil), Lexus (que se incorpora por vez primeira na Feira ribeirense), Mercedes, Kia, Skoda, Ford e Hyundai.
