A directora xeral de Desenvolvemento Pesqueiro, Marta Villaverde, mantivo este luns 10 de xuño un encontro de traballo con representantes das confrarías de Muros, Porto do Son, Portosín, Lira e Noia e as súas asistencias técnicas co obxectivo de abordar de forma conxunta as necesidades dos bancos marisqueiros xestionados por estas entidades na zona. A xuntanza, que tivo lugar na sala de xuntas da lonxa de Muros, serviu para analizar a situación particular da actividade marisqueira e para afondar na necesidade de intercambiar co sector as experiencias acumuladas e iniciativas en marcha co obxectivo de alcanzar conclusións sobre as cales elaborar novas propostas.
Durante a reunión os representantes das entidades reflectiron o delicado estado dos bancos marisqueiros que explotan e as dificultades que ven de cara á vindeira campaña.
A xuntanza encadrouse nas sesións de traballo da Consellería do Mar cos máximos representantes das confrarías galegas para abordar directamente con cada pósito os aspectos particulares dos diferentes bancos coa finalidade de artellar respostas específicas e máis efectivas ás necesidades de cada un deles.
Na sesión deste luns informóuselles aos representantes das confrarías sobre o estado de liñas de axudas abertas así como as que se publicarán proximamente a disposición do sector marisqueiro.
