O concelleiro de Deportes de Ribeira, Xabier Vidal, presentou este luns os detalles da celebración local do Día da Bici, programada para este 2 de xuño. Fíxoo na compaña de xunto a Javier e Moncho Sampedro e lembrando que o obxectivo é fomentar o uso do vehículo limpo, sustentábel e saudábel por excelencia: a bicicleta.
A xornada, cuxa comitiva ciclista terá saída dende a praza de España, está organizado polo Concello en colaboración co Club Saltamontes e a Asociación de Veciños de Carreira.
Segundo explicou o concelleiro, o casco será obrigatorio para todo o mundo; e a recollida de dorsais será dende as 10 da mañá e a saída ás 11.00 horas.
O percorrido terá 5 quilómetros, que sairá cara as Abesadas, pasando por Rosalía de Castro, rúa de Galicia, Romero Ortiz, paseo das Carolinas e volvendo polo malecón de novo para rematar na praza de España.
No inicio do evento, farase unha homenaxe a Dositeo Fernández e Carlos Guerra, moi vinculados ao ciclismo.
Xavier Vidal agradeceu a colaboración de Sport Bike e Dalle Pedal para a organización desta cita deportiva, así como o apoio do GAEM e a Policía Local de Ribeira.
Javier Sampedro, pola súa parte, destacou a necesaria inscrición previa para poder ter unha previsión da participación e mellorar o avituallamento e o control do tráfico no propio día.
A celebración do Día da Bici é unha cita anual que busca promover o uso da bicicleta como medio de transporte sostíbel, saudábel e ecolóxico. Este evento, que contará co sorteo de agasallos, ofrece aos participantes a posibilidade de gozar “dun paseo seguro e agradábel pola cidade de Ribeira”, sinalou o concelleiro.
