Este martes 28 de xaneiro desenvolveuse na sede de AMBAR en Frións (Carreira, Ribeira) unha importante xornada de traballo destinada a facer avanzar a comarca en materia de igualdade, inclusión e sensibilización de cara as diferentes capacidades e sensibilidades.
A xornada consistiu nunha xeira de traballo na que participaron alumnas e alumnos do CIFP de Coroso de Ribeira (18 estudantes de segundo de FPB) e máis a comunidade de usuarias e usuarios da asociación AMBAR, a asociación de persoas con diversidade funcional con sedes en Frións e A Pobra.
Na xornada, a rapazada do CIFP tivo ocasión de desenvolver actividades concretas cos usuarios de AMBAR, coñecendo de primeira man o relevante traballo que realiza a asociación coas persoas con capacidades diversas. Máis en detalle, o alumnado do centro participou en dúas accións: un obradoiro de ornamentación e deseño gráfico e máis un taller de estimulación cognitiva e motriz.
Segundo informaron os organizadores do encontro, as e os rapaces pasaron unha mañá moi especial e puideron coñecer o traballo que fan diariamente e máis a importancia da integración e socialización das persoas con diversidades funcionais e motrices.
