O Centro Cultural Lustres Rivas de Ribeira, espazo adicado ao encontro entre a palabra escrita e a expresión visual, acolleu este xoves 4 de abril a presentación do libro Comando Sintrom, da escritora compostelá Beatriz García Turnes, no que estivo presente o pianista Yuri Durán; e tamén a exposición A expresión da Cor, do artista ferrolán Juan Codesido.
No acto estiveron presentes o alcalde de Ribeira, Luís Pérez, e as concelleiras Antía Alberte, Cruz Rivadulla e Fernando Abraldes.
Comando Sintrom, editado por Galaxia, é un feixe de relatos de mulleres que se atopan no final da súa vida. Con todo, non son avoas de pano na cabeza, sentadas a carón da lareira ou enredadas coas tarefas domésticas. A autora presenta mulleres actuais que, a pesar da súa idade, ou quizais por iso, son quen de adaptarse aos novos tempos. Estas anciás manéxanse nas redes sociais, pasean o can pola cidade, camiñan por prescrición médica e gozan da vida na medida en que poden. O tempo xoga na súa contra e aparecen os achaques e tamén se enfrontan á soidade, ou ao pasado que chega para saldar débedas pendentes, porque ser vella non te fai mellor nin peor persoa, pero muda a visión da vida.
Polo que se refire á mostra A expresión da Cor, é unha viaxe polas formas xeradas por Codesido, o artista que para chegar á expresión emprega a cor como xeradora de formas. En palabras da Deputación de Pontevedra, “trátase dunha exposición moderna, difícil de encadrar dentro dos estilos pictóricos contemporáneos, que destaca pola forza das cores puras en contraste”. Predominan pezas de abstracción pura, xerada por distintos tipos de técnicas para buscar, en todo momento, a conexión coa parte inmaterial do ser por medio das emocións.
