Para os que aínda non teñamos plans para esta ponte, o sábado 30 a Fundación Montescola achéganos unha alterativa de lecer combinando natureza, aprendizaxe e conservación da paisaxe. Trátase dunha convocatoria de voluntariado ambiental do proxecto Comunidades Activas e Paisaxes Resilientes a Incendios Forestais e Cambio Climático (CAPRIF-CC), coa que se procurará plantar máis dun cento de árbores frondosas autóctonas na Área Conservada pola Comunidade de Froxán, en Lousame (A Coruña), recoñecida polo Programa da ONU para o Ambiente desde 2017.
Montescola explica que “as persoas participantes non só poderán coñecer este territorio singular e contribuír a protexelo fronte ás ameazas do lume e do cambio climático, máis tamén aprender as técnicas de poda forestal e descubrir como poñer en valor os aproveitamentos multifuncionais do monte, combinando, por exemplo, castañas, cogumelos e madeiras de calidade”.
A xornada, que acabará cunha degustación, está aberta a todas as idades e o prazo de inscrición finaliza este xoves 27 (só é necesario enviar un correo electrónico a info@montescola.org).
Montescola explica Froxán está desenvolvendo unha experiencia piloto de “cortalumes verdes”, que son infraestruturas forestais que integran especies máis resistentes ao lume e forman espazos resilientes con maior biodiversidade e posibilidades de uso multifuncional. As actuacións forman parte do proxecto CAPRIF-CC no que participan a Fundación Juana de Vega, a Fundación CEER, CETEMAS, Montescola e a Asociación Galega de Custodia do Territorio, e que conta co apoio da Fundación Biodiversidad do Ministerio para la Transición Ecológica y el Reto Demográfico no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU.
Ademais das xornadas de voluntariado forestal, o proxecto CAPRIF-CC creará unha rede de Living Labs en varios territorios nos que se levarán a cabo numerosas actividades de innovación aberta, formación e co-creación buscando a dinamización económica no ámbito forestal e os usos multifuncionais.
Tamén se elaborará un mapa de talento e un atlas de boas prácticas para pór en valor e divulgar as experiencias de conservación comunitaria e xeitos de xestión positivos en termos de fomentar territorios resilientes e biodiversos.
