Membros da Corporación municipal, persoal do Concello e veciñanza da Pobra do Caramiñal concentráronse ás 12.00 horas deste 20 de marzo fronte a Casa Consistorial para gardar un minuto de silencio con motivo do feminicidio sucedido na tarde deste martes 19 en Palmeira.
Ao inicio, o alcalde José Carlos Vidal dirixiuse aos presentes para explicar que “esta é unha forma de trasladar o pésame e apoio á familia e amizades da moza asasinada, ademais dun acto de rexeitamento ante este crime machista”. Tamén se pretende así mostrar a solidariedade coa veciña localidade de Ribeira, conmocionada por este terrible suceso. O rexedor salientou a importancia de “seguir traballando arreo para erradicar a violencia machista”.
Ademais, o Concello da Pobra do Caramiñal súmase á concentración deste mércores 20, ás 20.00 horas, na explanada do porto de Ribeira, ao lado de Capitanía Marítima, ademais de secundar a convocatoria efectuada por JEALSA nas inmediacións das súas factorías presentes na comarca.
