Barafunda Teatro trae esta semana a Boiro o espectáculo familiar Antón, un neno diferente. Será este venres 22 ás 20.00 horas na Casa da Cultura de Boiro.
A obra relátanos a historia de Antón, un neno que naceu fisicamente distinto aos habitantes da súa vila, que facían burla del e reprochábanlle todo o malo que pasaba na vila. Un día unha epidemia de variola infectou a toda a poboación menos a Antón e os veciños decidiron expulsalo da vila. Na súa viaxe atópase camiño dun mostro (que é realmente o Mago Uxío que está baixo un feitizo e ofrécelle ao neno cumprir un desexo se pode axudarlle a desfacerse deste feitizo)…
Trátase dun espectáculo multidisciplinar de teatro de actores e monicreques en diversas técnicas (sombras, bunraku, obxectos…) dirixido a público familiar e infantil. A través dunha historia fantástica, a obra toca temas como a migración forzada e o acoso, poñendo o foco na importancia de valores coma a tolerancia, o amor, o respecto pola diversidade e, sobre todo, a valentía para afrontar os obstáculos e lograr os obxectivos que nos propoñamos..
