Este venres 15 de marzo celebrarase en Rianxo a presentación da novela gráfica Zeca Afonso. Balada do desterro da escritora galega Teresa Moure e a ilustradora portuguesa María João Worm. Será no Auditorio Municipal a partir das 20.30 horas.
Trátase dunha obra de banda deseñada editada en galego-portugués por aCentral Folque. A orixe da obra está no “fascínio que senten as autoras por aquel home que cantaba por causas políticas”. Poñen o foco no que aconteceu antes de se tornar Zeca no cantante famoso que deu voz á Revolución dos Cravos, a súa nenez e mocidade en terras africanas, as súas viaxes polo mundo. A obra tamén ten un punto de partida nun dos seus concertos en Galiza e as vivencias segredas que relatou a Begónia Moa. Nestas conversas, segundo adianta Folque, “as suas preocupações mostram que está feito de carne humana; carne vulnerável que palpita e duvida, que vibra ao contacto com outras peles e depois teme tê-las magoado, que persegue dar um sentido à vida. Também à morte”.
