No 23 de febreiro realizaranse en todo o territorio galego numerosos actos de lembranza e homenaxe a Rosalía de Castro. Un ano máis, o Concello da Pobra do Caramiñal conmemora esta data e na xornada de mañá desenvolveranse as actividades centrais da axenda deseñada pola Concellaría da Cultura.
Ás 13.00 horas realizarase a tradicional ofrenda cívica na praza que leva o nome da escritora, coa lectura dun manifesto e o repartimento do Caldo de Groria entre as persoas asistentes.
Con anterioridade, ás 12.00 horas, estará no Teatro Cine Elma o grupo de música tradicional Xiada e ofrecerase unha lectura e interpretación de poemas a cargo de alumnado do CEP Pilar Maestú Sierra e parte de alumnado do CEP Salustiano Rey Eiras. En caso de mellora das condicións meteorolóxicas, as actividades previstas no Elma trasladaranse á referida praza.
A maiores, cómpre lembrar que a Administración local impulsou outras accións arredor desta data dirixidas ás crianzas, como, por exemplo, o xogo-concurso As Sete Rosalías.
