O Club Financiero de Santiago presentará no venres, 6 de novembro, en Ribeira o Informe de Conxuntura Económica (ICE) de Galicia 2025, nunha xornada na que se darán a coñecer as particularidades e os retos da economía ribeirense no marco das principais conclusións do estudo para o conxunto da comunidade.
O acto comezará ás 12.30 horas na sala polivalente do Auditorio municipal e contará coa participación da alcaldesa de Ribeira, María Sampedro, e do presidente do Club Financeiro de Santiago, Roberto Pereira Costa.
Será María Bastida, catedrática en Economía da Universidade de Santiago e integrante do equipo redactor do ICE, a encargada de explicar o documento e afondar no diagnóstico económico de Ribeira, achegando unha visión específica da estrutura produtiva do municipio, as súas fortalezas e os desafíos que condicionan o seu desenvolvemento.
O ICE 2025 ofrecerá, por primeira vez, unha diagnose estratéxica do conxunto de Galicia, máis alá da análise provincial. O informe estuda a realidade económica galega a través de cinco ámbitos de decisión -empresa, mercado, territorio, institucións e ecosistema- e identifica os principais factores que condicionan a capacidade de crecemento do tecido produtivo.
Deste xeito, achégase coñecemento económico ao territorio e promóvense espazos de reflexión sobre as oportunidades e os retos que afrontan os municipios galegos.
