
A Asociación de Veciños de Araño, en colaboración co Concello de Rianxo e a Deputación da Coruña, organiza este sábado 21 de novembro en Buhía-Araño a quinta edición da súa Muiñada.
A actividade busca reivindicar e poñer en valor os antigos muíños de auga situados na contorna do rio Te, na parroquia de Santa Baia de Araño (Rianxo).
A Muiñada do Araño (tamén coñecida como Muiñada no Té) é unha xornada cultural, etnográfica e festiva que adoita comezar cunha visita aos muíños da contorna e cunha xeira de moenda. O punto de saída serán os muíños do Cubo da Ermida para logo visitar o de Quintáns, o da Veiga e o de Lemos.
A xornada inclúe unha novamente vertente musical con agrupacións tradicionais galegas, desta volta contarase ao mediodía co grupo No Cómbaro e con Cé Orquestra Pantasma.
Tamén haberá petiscos nos muíños, un campionato de debullado de millo e un concurso de sobremesas (postres) de outono.
Pola tarde a partir das 16.30 celebrarase unha tarde de xogos populares para a rapazada na contorna do Centro Cultural da Capela con monitores e logo ás 19.00 contarase coa presenza do clown Peter Punk, que achegará ás nenas e nenos (e maiores) o espectáculo Peor imposible.
A vertente musical proseguirá polo serán (a partir das 20.30 horas) cos boirenses D’Crooners, The Cuncas e Model Music, seguidos do DJ Blas. Haberá pizzas do país (pizzas artesanais feitas en forno de leña).



