O alcalde de Boiro, José Ramón Romero, participou esta mañá nun encontro cos coworkers do Lab Barbanza de Boiro para coñecer as novas incorporacións e as súas ideas de negocio, así como o avance dos proxectos empresarias dos emprendedores aloxados no espazo.
Na actualidade hai unha 20 de proxectos emprendedores que se atopan en distintos momentos, dende a fase previa de maduración de idea a xa a constitución como empresa para comezar a súa traxectoria. Entre os novos proxectos atópanse emprendedores centrados no ámbito turístico; outros especializados en software; ou as artes.
O obxectivo deste encontro de networking foi a posta en común da actividade que están a desenvolver os distintos coworkers para poder crear sinerxías entre os propios usuarios do espazo e levar a cabo actividades e proxectos en común.
O espazo coworking Lab Barbanza do Concello de Boiro forma parte da Rede de Espazos de traballo colaborativo da Deputación da Coruña. Está situado no Centro de Formación, Innovación, Emprego e Emprendemento do Concello de Boiro no Polígono de Espiñeira, un espazo multidisciplinar no que se desenvolven actividades formativas de diversa índole.
