O pasado sábado 12 de setembro, 120 persoas participaban no XXI Día da Bici de Rois, un encontro que reuniu xentiña dende os 2 até os 83 anos para gozar do deporte e das paisaxes do municipio de Rois.
A día botaba a andar cunha xincana para a cativada organizada polo Club Ciclistas Padronés Cortizo. De seguido, os ciclistas partiron do polideportivo de Rois para completar un percorrido de 11 quilómetros pola: Pontenova, A Peruca, A Meana, Seaxe, de novo A Meana e Lamego. Logo do avituallamento na praia fluvial, volvían por Seira, Oín e Antequeira para rematar no punto de partida, o polideportivo.
Mateo Ríos, de pouco máis de dous anos, recibiu o trofeo ao participante máis novo de mans do concelleiro Antonio Esparís. O padronés Mario Alfonsín, de 83 anos, recolleu o premio ao ciclista máis veterano, entregado polo exciclista Suso Blanco Villar, que tamén participou na marcha.
Ao remate sorteáronse numerosos agasallos. Xiana Salgueiro gañou o premio estrela, unha bicicleta de montaña que lle entregaron Esparís e Blanco Villar, mentres que Sonia Maquieira resultou agraciada cun xantar ou cea para dúas persoas no restaurante Pedra Santa.
Dende o Concello de Rois quixeron agradecer o labor de Protección Civil de Rois e de Padrón, así como o apoio do Club Ciclista Padronés, Gadis, Supermercados Froiz, Restaurante Pedra Santa e AdeMario Bike Services na organización desta xornada.
