Unha persoa tivo que ser evacuada este martes a bordo do helicóptero medicalizado con base en Santiago tras sufrir unha aparatosa caída mentres montaba a cabalo no concello de Lousame.
Os feitos producíronse arredor das 17:30 horas da tarde na parroquia de Tállara. Un particular contactou co centro de atención ás emerxencias do 112 Galicia para dar a voz dalarma, indicando que a vítima se atopaba ferida nunha zona de difícil acceso rodeada de abundante vexetación.
Ante a dificultade do terreo e a necesidade de asistencia rápida, o 112 mobilizou de inmediato un operativo no que coordinou a Urxencias Sanitarias de Galicia-061, á Garda Civil, ao Grupo de Emerxencias Supramunicipal (GES) de Noia e á agrupación de Protección Civil de Lousame.
A rápida intervención dos servizos en terra permitiu letrar a asistencia ata a chegada do helicóptero do 061, que puido tomar terra nas proximidades do lugar do accidente. A persoa ferida, que se mantivo consciente en todo momento, foi atendida polos efectivos sanitarios no propio punto antes de ser trasladada por aire ao seu hospital de referencia para recibir atención especializada.
