O Concello de Rianxo, a través das brigadas municipais, está a traballar estes días na limpeza integral do rueiro da vila rianxeira. Os labores forman parte do plan municipal de limpeza e desinfección, que segue adiante coas debidas restricións por mor dunha escaseza de auga que non ten visos de solucionarse.
Ás actuacións que se están a levar a cabo no centro de Rianxo sumaranse na segunda quincena de agosto unha serie de traballos de limpeza e mantemento da rede de sumidoiros.
Os ditos traballos incluirán a inspección, limpeza e desobstrución dos sumidoiros e arquetas, comezando polas áreas máis propensas á acumulación de auga. Desta maneira, búscase asegurar que o sistema de drenaxe estea en óptimas condicións para a época do outono e inverno.
