Rematou xullo e co remate do mes finalizou a terceira quenda do programa Concilia de Verán do Concello de Noia, chegando xa ao ecuador desta edición.
A concelleira de Educación e Mocidade, Ana Blanco, acompañou á rapazada neste último día de quenda, compartindo con eles unha mañá (a do venres 31) chea de xogos, risas e moi bo ambiente. O programa incluíu obradoiros, deporte, excursións, auga, novas amizades e moitas aventuras: un completo feixe de actividades que buscaban garantir unhas vacacións divertidas e creativas para a rapazada e botar unha man ás nais e aos pais que teñen que seguir traballando en período vacacional.
O programa Concilia de Verán do Concello de Noia configúrase como un servizo esencial para axudar ás familias na conciliación familiar e laboral durante as vacacións escolares. Este servizo desenvólvese baixo o marco da nova ordenanza Noia Concilia, deseñada para garantir estas axudas durante todos os días non lectivos do ano.
Esta edición acadou un récord histórico de solicitudes, superando as 220 peticións nas quendas con maior capacidade (preparadas para 160 prazas).
A cuarta quenda do campamento comeza este 1 de agosto (ata o 15, cando dará comezo a quinta).
