As instalacións do Barbanza Golf, en Boiro, acollerán do 21 ao 23 de agosto a duodécima edición do Torneo de Golf CONGALSA, “unha cita que se converteu na competición con máis traxectoria histórica do club e nunha das probas deportivas con maior arraigamento na comarca”. Así o puxo en valor a directora de Relacións Externas da Corporación Empresarial CONGALSA, Isabel Cañas, que esta mañá visitou o campo no que se celebrará a nova edición deste torneo.
Na súa visita ás instalacións Isabel Cañas foi recibida por Alberto Colón, presidente do Club Deportivo Barbanza Pitch & Putt, quen sinalou que “con máis dunha década de historia, o torneo afronta a súa próxima convocatoria mantendo a aposta por reunir a xogadores de diferentes categorías nun ambiente que combina convivencia, competición e promoción do golf como unha disciplina deportiva aberta a todos os públicos”.
O XII Torneo de Golf CONGALSA disputarase baixo a modalidade Individual Stableford, un formato no que cada participante compite de maneira individual e a clasificación establécese mediante un sistema de puntos segundo o resultado obtido en cada foxo. Esta modalidade permite que diferentes xogadores poidan competir en igualdade de condicións, tendo en conta o seu hándicap. Xunto a isto, a proba puntuará para a Orde de Mérito (OM) do C.D. Barbanza Pitch & Putt, polo que os resultados obtidos polos participantes sumarán para a súa clasificación xeral da tempada.
Saída a tiro
Unha das particularidades desta competición será o sistema de saída a tiro que establece que todos os xogadores de cada quenda inicien a competición á mesma hora desde diferentes foxos do percorrido. Así, poderán optar por saír o venres 21 de agosto ás 17.00 horas; o sábado 22 ás 11.00 ou ás 17.00 horas; ou o domingo 23 ás 10.30 horas.
No apartado deportivo, o torneo contará con trofeos para os mellores clasificados nas categorías Scratch, Hándicap, Sénior, Feminina e Júnior, ademais de galardóns para os segundos clasificados en Scratch e Hándicap. Xunto a isto, todos os participantes recibirán un agasallo de benvida (un paraugas corporativo de CONGALSA) e poderán participar no sorteo especial dun Putt Spider.
A maiores, o torneo contará cun premio especial para o xogador que logre un foxo en 1 no foxo 18, consistente nun cheque de 500 euros.
Inscricións e cotas
Todas as persoas interesadas en participar nesta competición poderán inscribirse ata o vindeiro 20 de agosto a través de Golfdirecto.com, mediante o correo electrónico barbanzagolf@gmail.com, por teléfono (651 17 29 45) ou no propio campo de golf. A inscrición terá un custo de 15 euros para os menores socios e de 20 euros para os menores non socios. Na categoría de adultos, a cota será de 18 euros para os socios do club e de 25 euros para os non socios.
Finalmente, o acto de entrega de premios será o domingo, 23 de agosto, a partir das 13.00 horas coa entrega de premios, o sorteo de agasallos e unha degustación de produtos de CONGALSA.
Fortalecer o vínculo coa comarca
Durante a súa visita ás instalacións do Barbanza Golf, Isabel Cañas puxo en valor o patrocinio da
empresa pobrense á iniciativa e o seu respaldo ao deporte base na súa contorna máis próxima. “Este torneo representa valores que forman parte do compromiso da nosa compañía, coma o fomento dos hábitos saudábeis e a actividade física, e permítenos seguir fortalecendo o noso vínculo coa comarca do Barbanza”, asegurou.
Isabel Cañas desprazouse esta mañá ata Boiro xunto a Irene Souto, responsábel de Compliance e Sustentabilidade Corporativa do grupo empresarial, para presentar ao torneo con Alberto Colón, presidente do Club Deportivo Barbanza Pitch & Putt. No acto participaron tamén membros do equipo de golf de CONGALSA.
