O Concello da Pobra do Caramiñal celebrou este xoves unha nova sesión ordinaria do Pleno municipal. Ao inicio da sesión, o Grupo Municipal do PP decidiu abandonar o salón de plenos ao manifestar o seu desacordo coa celebración da sesión no día de hoxe.
Durante a súa intervención, o voceiro do grupo popular defendeu que o Pleno ordinario debía terse celebrado no mes de xullo. Pola súa banda, o alcalde explicou que o cambio de data fora comunicado previamente a todos os grupos municipais, debido á imposibilidade de asistencia do interventor na data inicialmente prevista. Segundo sinalou, ningún grupo manifestou inconvenientes para celebrar a sesión no día de hoxe e o Grupo Municipal do PP avanzou que presentaría igualmente un escrito sobre esta cuestión, polo que se mantivo a convocatoria.
Tras a saída do Grupo Municipal do PP, a sesión continuou co desenvolvemento da orde do día. Tanto o alcalde como o resto das persoas representantes presentes coincidiron en que, por responsabilidade coa veciñanza, cumpría continuar co Pleno para debater e someter a votación os asuntos previstos.
Todos os puntos sometidos a votación foron aprobados por unanimidade das e dos representantes presentes, agás a proposta relativa ás festividades locais para o ano 2027, que saíu adiante coa abstención do BNG.
Así mesmo, a Corporación acordou, por responsabilidade institucional e en consideración ao Grupo Municipal do PP, aprazar as dúas mocións presentadas por este grupo, correspondentes aos puntos 13 e 14 da orde do día, para seren debatidas e votadas na seguinte sesión plenaria, coa presenza de todas as concelleiras e concelleiros.
A sesión rematou coa quenda de rogos e preguntas.
O Pleno foi retransmitido en directo e permanece dispoñible na canle oficial de YouTube do Concello. A veciñanza pode acceder á gravación íntegra para coñecer o desenvolvemento da sesión, as intervencións dos distintos grupos municipais e os argumentos expostos en cada un dos asuntos tratados. Ademais, como é habitual, as sesións plenarias poden seguirse tanto de maneira presencial como a través da retransmisión en directo, reafirmando o compromiso do Concello coa transparencia e co acceso á información pública.
