O alumnado-traballador do Obradoiro de Emprego Tahume XI continúa coa posta en marcha das actuacións previstas dentro do programa formativo, combinando a aprendizaxe práctica coa realización de traballos de interese para a veciñanza.
Na especialidade de carpintería, o alumnado iniciou os primeiros traballos no taller, onde está a desenvolver as prácticas correspondentes á súa formación, adquirindo experiencia no manexo de ferramentas, maquinaria e técnicas propias do oficio.
Paralelamente, o alumnado da especialidade forestal está a levar a cabo labores de limpeza, desbroce e acondicionamento en distintos espazos naturais do municipio. Durante estas primeiras semanas, os traballos céntranse na contorna do Castro de Baroña e na zona de Coira, contribuíndo á conservación destes espazos, á mellora da súa imaxe e á prevención do risco de incendios.
O Obradoiro de Emprego Tahume XI continúa así o seu labor formativo e de servizo público, permitindo que o alumnado adquira experiencia profesional ao tempo que realiza actuacións que repercuten positivamente na mellora do patrimonio natural e dos espazos de uso público do concello.
