O IV Torneo Solidario Interparroquial celebrado o 27 de xuño en Vista Alegre logrou recadar 9.885 euros en beneficio de ASANOG, a Asociación de Cáncer Infantil e Xuvenil de Galicia. O concelleiro, Marcos Fajardo, participou no acto de entrega xunto con Lara Buig e Marga Hermo, da organización; e Fran Allo e José de Jesús, de ASANOG.
Trátase dunha xornada de deporte e solidariedade na que participa a hostalaría local e equipos de cada unha das parroquias.
“Comezamos esta andaina hai catro anos e levamos recadados xa mais de 40.000 euros que contribúen a que ASANOG poidan desenvolver a súa actividade”, recoñeceron dende a organización, agradecendo a todas as empresas e persoas que contribúen a que sexa posíbel levar a cabo esta iniciativa solidaria.
ASANOG é unha entidade que presta apoio económico, psicolóxico e de acompañamento a familias de nenos e nenas con cancro. Por parte da entidade agradeceron a implicación da organización, a Administración local, as empresas colaboradoras e a veciñanza porque “cando un pobo se xunta xorden cousas tan bonitas coma esta”, comentaron.
Pola súa parte, o concelleiro de Deportes, Marcos Fajardo, agradeceu a toda a organización que fixo posible a recadación para ASANOG: “Dende o Concello de Boiro imos estar sempre ao lado de iniciativas como esta que implica a toda a sociedade boirense nunha tarde de deporte, fútbol, diversión e que colabora cunha boa causa”.
