O Concello de Rianxo está a efectuar estes días traballos de reparación de varios elementos de xogo da zona de ocio infantil do Campo de Arriba, elementos que presentaban diversos desperfectos polo uso da rapazada e polo deterioro do paso do tempo. Ademais, nas vindeiras semanas comezarán tamén os traballos de remodelación da zona deportiva situada na contorna superior, a carón do Campo de Arriba. Instalarase unha pista polideportiva e un circuíto de calistenia. O proxecto conta cun orzamento de 48.380,64€. Para estes traballos o Concello recibiu unha axuda da Consellería de Presidencia, Xustiza e Deportes por importe de 33.866,45€. “Trátase dunha actuación que obedece a unha vella demanda das familias rianxeiras dada a falta deste tipo de espazos na vila”, informou o Concello. O proxecto inclúe a creación dun circuíto específico de ximnasia ao aire libre, outra demanda de moitos veciños e veciñas.
