Galicia experimentará este mércores un progresivo asentamento das altas presións que deixará un escenario meteorolóxico marcado polo retorno do vento de compoñente norte. A xornada arrincará con abundantes nubes baixas e probabilidade de orballos, que serán máis frecuentes no tercio norte da comunidade.
Co paso das horas, a cobertura nubosa irase disipando de xeito desigual. A metade sur gozará de grandes clareiros e ceos moi abertos cara á tarde, mentres que no norte manterase a presenza de nubes e algún orballo ocasional, especialmente concentrado na comarca da Mariña.
No tocante aos termómetros, as temperaturas manteranse en valores similares aos dos últimos días ou rexistrarán un lixeiro descenso. O vento soprará frouxo de norte en xeral, gañando intensidade pola tarde para deixar intervalos de carácter moderado nas Rías Baixas. (Máximas de 25 a 28 graos).
O noso mar; Vento do norte á mañá e do norte á tarde e á noite, forza 2 a 3 á mañá e 3 a 5 á tarde e á noite. Mar ovellado á mañá e marusía á tarde e á noite. Visibilidade boa. Mar de fondo do noroeste, con ondas de 0.5 a 1.5 metros.
