Cáritas Diocesana de Santiago fixo un chamamento á solidariedade tras informar da campaña de emerxencia activada pola Confederación de Cáritas Española para axudar ás vítimas do devastador terremoto que sacudiu Colombia o pasado 10 de agosto.
O seísmo, de magnitudo 7,4 e con epicentro no municipio de San José del Palmar (departamento do Chocó), golpeou con forza o centro e occidente do país afactando a doce departamentos. Segundo os últimos balances oficiais, a catástrofe deixa polo de agora 132 persoas falecidas e 1.495 feridas.
Resposta humanitaria sobre o terreo
Desde os primeiros momentos tras o tremor, Cáritas Colombia activou o seu Servicio Nacional de Emergencias. En coordinación coas Pastorales Sociales e as Cáritas Diocesanas locais (Istmina-Tadó, Quibdó, Pereira, Cali e Manizales), despregáronse equipos de emerxencia e voluntariado para chegar ás comunidades máis illadas e en zonas rurais de difícil acceso.
As tarefas prioritarias centranse actualmente no reparto urxente de alimentos, auga potable e produtos básicos de hixiene entre a poboación afectada.
Fondo de emerxencia e cooperación
Cáritas Española, que conta cunha longa traxectoria de traballo conxunto coa contorna colombiana en proxectos de paz e asistencia, mobilizou de inmediato 100.000 euros do seu Fondo de Emerxencias. Esta contía destinarase a cobrir necesidades básicas e urxentes:
- Auga potable e asistencia alimentaria de primeira necesidade.
- Atención sanitaria básica e kits de hixiene.
- Aloxamento temporal para as familias que perderon o seu fogar.
Todas as persoas que desexen apoiar os labores de rescate e asistencia ás vítimas en Colombia poden realizar as súas achegas económicas na conta habilitada por Cáritas Española:
- Entidade: CaixaBank
- IBAN:
ES76 2100 2208 3002 0025 4904 - Concepto: Terremoto Colombia
Cáritas agradece profundamente a solidariedade da cidadanía coas persoas e comunidades que están a sufrir as devastadoras consecuencias desta catástrofe.
