O Concello da Pobra do Caramiñal contará cun Espazo Violeta durante as festas do Carme dos Pincheiros 2026. O punto estará situado na praza do Alcalde Segundo Durán e permanecerá operativo durante catro xornadas das celebracións.
O Espazo Violeta estará dispoñíbel o venres 14 de agosto, de 23.00 a 01.00 horas; o sábado 15, de 20.00 a 01.00 horas; o domingo 16, de 23.00 a 01.00 horas; e o luns 17, de 23.00 a 01.00 horas.
Baixo a mensaxe Se ves ou sofres unha agresión: acude ao Espazo Violeta!, este punto busca contribuír á prevención e sensibilización fronte ás violencias machistas durante unhas datas nas que a vila reúne numerosas persoas arredor das diferentes propostas festivas.
A Concellería de Igualdade do Concello da Pobra do Caramiñal continúa apostando por políticas de igualdade e prevención das violencias machistas, co obxectivo de favorecer espazos de lecer seguros e respectuosos para todas as persoas.
A presenza do Espazo Violeta nas festas reforza este compromiso e incide na importancia da sensibilización e da responsabilidade colectiva para gozar das celebracións desde o respecto e a igualdade.
A iniciativa conta co apoio do Pacto de Estado contra a Violencia de Xénero e do Ministerio de Igualdade do Goberno de España.
