Ribeira deu este xoves a benvida á décimo novena edición da feira Artemar que se desenvolverá no centro da cidade ata o 16 de agosto, con preto dun cento de stands de venda de produtos, ademais de funcións infantís, animación de rúa e espectáculos nocturnos. A rúa de Galicia volve ser a arteria principal, se ben foi incorporado un treito de Rosalía de Castro e da contorna da praza do Concello; todas elas engalanadas con decoración que alude á temática mariñeira como redes ou apeiros de pesca, predominando as cores branca, vermella e azul.
As compañías que se encargaron de animar o ambiente polo centro da cidade nesta primeira xornada foron O mergullador aventureiro, O lume do océano, Ruxen as ondas, Tormenta de lume, Ao compás das mareas e Capitán en apuros.
Concurso de Decoración de Establecementos
O Concello de Ribeira convoca un Concurso de Decoración de Establecementos para que “a temática mariñeira chegue a cada recuncho”. Poden participar tódolos negocios da cidade sen necesidade de inscricións. Os locais mellor valorados elixiranse por votación popular, acudindo á oficina de Turismo do Malecón e cubrindo unha papeleta cos datos. Os tres establecementos mellor valorados recibirán un agasallo e sortearase outro entre tódalas persoas que votaron.
Horario da feira
Esta edición abriu as súas portas na tarde deste xoves 13, con peche á medianoite. No venres 14, sábado 15 e domingo 16, abrirá de 12.00 a 14.30 horas e de 18.00 horas ata a medianoite.
O recuncho de xogos (gratuíto) da praza de Porta do Sol está operativo de 12.00 a 14.30 e de 18.00 a 22.30 horas. En canto aos xogos infantís (tamén gratuítos e en dito espazo), desenvólvense de 12.00 a 14.30 e de 18.00 a 21.30 horas.
As ecoatraccións repartiranse por toda a feira, de 12.00 a 14.30 e de 18.00 a 22.30 horas.
O horario para os obradoiros demostrativos participativos, na praza de Concello, é de 12.00 a 14.00 e de 18.00 a 22.00 horas.
E o photocall mariñeiro ficará dispoñíbel durante tódalas xornadas.
