A Romaría de Exipto pechou esta fin de semana unha nova edición cun balance “moi positivo”, en palabras da organización (a comisión veciñal de festas), que destacou que a cita reuniu a centos de persoas durante tres días de celebración en Abanqueiro. A programación, pensada para todos os públicos, combinou tradición, música, gastronomía e actividades familiares, consolidando unha vez máis esta cita como un dos eventos máis destacados do verán na comarca.
As festas comezaron o venres cunha actividades interxeracional organizada por AGADEA e a tradicional subida dos santos desde a igrexa de Abanqueiro ata a capela de Exipto, seguida da misa en honra da Virxe de Exipto. A continuación, celebrouse un espectáculo para todos os públicos de Raquel Queizás. E xa pola noite, o festival O Retumbar da Telleira reuniu sobre o escenario a Mal Finde, Belako e Mujeres, rematando a xornada coa sesión de Rapariga DJ.
O sábado estivo marcado pola animación desde primeira hora coa alborada de O Ar de Loureda e Arume, a misa en honra de San Antonio, as actividades infantís e a festa da escuma.
A sesión vermú coa Orquestra Neverloura e a tradicional sardiñada popular congregaron a un gran número de asistentes, chegando a esgotarse todas as racións de sardiñas da cetárea Ángel Mar e tamén os mexillóns da Cooperativa de Abanqueiro repartidos durante a xornada.
Pola tarde celebrouse o torneo de birlos, a espectacular batucada de Boa Vibra desde Corea ata Exipto e, xa pola noite, a verbena co Dúo Charada e a Orquestra Platinum puxo a bailar ao público ata ben entrada a madrugada.
O domingo, día grande da romaría, viviuse unha intensa xornada arredor da capela de Exipto.
As diferentes misas en honra da Virxe, a procesión, a actuación do Grupo de Baile de Abanqueiro, o mercado ecolóxico organizado pola asociación Aloumiña, a sesión vermú con Tremenda Sudada e o tradicional xantar popular converteron o monte nun punto de encontro para veciños e visitantes.
A romaría continuou durante toda a tarde coa música de O Ar de Loureda e Home Orquestra, ademais dos xogos populares que volveron reunir a persoas de todas as idades.
A programación familiar tamén foi protagonista, con inchables gratuítos durante a fin de semana grazas ao patrocinio de JEALSA a través do seu programa de RSC We Sea, permitindo que os máis pequenos desfrutaran da romaría nun espazo pensado especialmente para eles.
Desde a Comisión de Festas da Romaría de Exipto agradeceron a implicación de todas as persoas voluntarias, veciñanza, patrocinadores, colaboradores, asociacións, artistas, grupos participantes, empresas e institucións “que fixeron realidade esta edición”.
“O seu apoio e compromiso volveron demostrar que a Romaría de Exipto é unha festa construída entre todos e para todos”, sinalaron dende a comisión, engadindo que “tralo éxito acadado este ano, xa comezamos a traballar coa ilusión posta na próxima edición, co obxectivo de seguir facendo medrar unha romaría que cada verán reúne a máis xente arredor da tradición, da cultura e da convivencia”.
