Este sábado 15 de agosto, a ría de Noia volverá acoller unha das citas con máis tradición do calendario deportivo da comarca: a XXIV Travesía Solidaria a Nado de ADECO-DEA.
Trátase dunha xornada para gozar do deporte e “sobre todo para seguir facendo da inclusión e do deporte adaptado os grandes protagonistas”, segundo informou a organización (ADECO-DEA coa colaboración do Concello), salientando que estamos “ante unha cita xa plenamente consolidada no calendario deportivo do municipio e que converte a ría nun espazo de convivencia, superación e inclusión a través do deporte”.
A saída será ás 10:00 horas desde o peirao de Testal (Noia), con chegada ao Freixo (Outes).
As 100 prazas dispoñíbeis están xa cubertas.
Na presentación da proba, o Concello de Noia quixo agradecer a ADECO-DEA o seu importante traballo solidario-deportivo e, tamén, a implicación d todas as entidades, colaboradores e persoas que fan posíbel unha nova edición da Travesía a Nado.
A cita será este sábado 15 de agosto. O control está programado para as 9:30, con saída ás 10:00.
Unha vez rematada a travesía, as persoas participantes serán trasladadas de novo ata Testal en embarcacións, onde recibirán unha medalla conmemorativa e compartirán uns petiscos como peche da xornada.
Durante todo o percorrido, a organización contará co apoio de embarcacións de acompañamento para garantir a seguridade dos nadadores e nadadoras.
A actividade está aberta tanto a persoas con discapacidade como a persoas sen discapacidade, mantendo o espírito integrador que caracteriza esta iniciativa desde os seus inicios.
