A Pobra do Caramiñal acolleu este xoves a presentación da etapa da Regata Rías Baixas, que terá como destino a vila o vindeiro venres 14 de agosto, procedente de Portonovo. Trátase dunha das citas máis destacadas do calendario náutico galego, que reunirá na localidade pobrense máis de 40 embarcacións e preto de 200 regatistas e acompañantes.
No acto participaron a concelleira de Turismo da Pobra do Caramiñal, Estefanía Ramos; o presidente do Real Club Náutico de Vigo, Tone Pérez; o delegado de Vela do Real Club Náutico de Vigo, Paco Rivera; o presidente do Liceo Marítimo de Noia, Óscar Prego; e o presidente da Federación Galega de Vela, Manuel Villaverde.
Durante a presentación destacouse a importancia desta regata tanto desde o punto de vista deportivo como turístico, xa que supón unha excelente oportunidade para dar a coñecer A Pobra do Caramiñal entre participantes e visitantes, ademais de contribuír á dinamización da actividade económica e hostaleira durante a súa estancia na vila.
A chegada da frota está prevista para o venres 14 de agosto, tras completar a etapa desde Portonovo. Ao longo da xornada, o porto deportivo converterase no punto de encontro das tripulacións e das persoas afeccionadas á vela, ofrecendo unha imaxe de gran atractivo para a veciñanza e as persoas visitantes.
Desde o Concello da Pobra do Caramiñal e a organización da regata animan a cidadanía a achegarse ao porto para recibir as embarcacións e desfrutar do ambiente que acompaña unha das probas de referencia da vela en Galicia.
