O Concello de Boiro colabora coa IX Travesía a Nado Illa da Bensa que organiza o Club de Natación Boiro e que terá lugar o vindeiro sábado 22 de agosto na praia de Carragueiros. O concelleiro de Deportes, Marcos Fajardo, participou na presentación xunto con Saturnino González, presidente do Club de Natación Boiro; Brais Nieto, director técnico do club; e Marga Hermo, directora de Relacións Institucionais de JEALSA.
A proba forma parte do XXII Circuíto Galego de Augas Abertas Arzúa Ulloa e contará con tres percorridos de 3.500 metros para adultos e máster; 1.000 metros para alevíns; e 200 metros para nenos.
“Temos agora 160 participantes e contamos con chegar aos 180-190; agardamos que sexa unha travesía tranquila e poder desfrutar da proba e do entorno”, recoñeceu Brais Nieto.
O presidente do club, Saturnino González, agradeceu ás entidades e empresas colaboradoras que “son fundamentais para que poidamos seguir celebrando esta proba deportiva que é unha das máis bonitas da tempada xa que se celebra nun entorno idílico como o de Carragueiros”.
Pola súa banda, a directora de Relacións Institucionais de JEALSA, Marga Hermo, puxo en valor o traballo do club e as sinerxías que se crean: “Dende JEALSA estamos convencidos de que apoiar o deporte contribúe a crear comunidade e iso é o bonito do deporte base en Boiro”.
Pola súa parte o concelleiro de Deportes, Marcos Fajardo, agradeceu a implicación do Club de Natación Boiro “que segue a medrar e cada vez conta con mais nenos e nenas do noso pobo que practican a natación” e convidou á veciñanza a achegarse o vindeiro 22 de agosto á praia de Carragueiros a “desfrutar dun día de natación nun entorno inmellorábel”.
