A Pobra do Caramiñal presentou este venres unha nova edición do Carme dos Pincheiros, que se desenvolverá do 14 ao 17 de agosto cunha ampla axenda na que a música e a cultura popular compartirán protagonismo con algunhas das tradicións máis arraigadas da vila.
Na presentación participou a concelleira de Cultura, Patricia Lojo, xunto con representantes da Comisión de Festas do Carme dos Pincheiros, que deron a coñecer os principais detalles das catro xornadas.
Durante a súa intervención, Lojo salientou o carácter especial desta cita e o seu forte vínculo coa identidade da Pobra. Fixo especial fincapé nos xigantes e cabezudos, que forman parte da historia e da tradición local e constitúen un dos elementos que lle confiren unha personalidade propia ao Carme.
A concelleira quixo recoñecer tamén o labor dos rapaces que se encargan de sacar estas figuras á rúa e facelas bailar durante estes días. Destacou “as horas que dedican, o esforzo e a ilusión que poñen para contribuír a manter vivo un legado que continúa pasando dunha xeración a outra”.
Lojo referiuse igualmente á implicación municipal e explicou que este ano o Concello realiza unha achega de 35.000 euros á Comisión de Festas, ademais de encargarse directamente da programación do venres. O apoio abrangue tamén os montaxes, as infraestruturas, a limpeza, a coordinación e outros labores necesarios para que todo estea preparado.
A edil agradeceu, así mesmo, a dedicación da Comisión do Carme dos Pincheiros, poñendo en valor o esforzo e as numerosas horas que require organizar unhas festas destas características.
Catro días de música e cultura popular
O programa comezará o venres 14 de agosto. Ás 19.00 horas sairán os xigantes e cabezudos co grupo de gaitas Trécola e, ás 19.30 horas, celebrarase a imposición de escapularios aos novos confrades.
Ás 20.00 horas realizarán un percorrido desde a praza Alcalde Segundo Durán ata o Concello e, ás 21.00 horas, celebrarase o pregón. A partir das 22.30 horas chegarán Déixate Estar, Firadela, Human, Eme Music e DJ Marcos Magán.
O sábado 15 arrancará ás 11.00 horas coa Banda de Música de Vilaboa, a Banda de Gaitas Airiños de Fene, Os Caraveiros, grupos de gaitas Xiada, Churimás e Os Arghalleiros. Ás 12.00 horas haberá xogos populares con Axóuxere e saída dos xigantes e cabezudos co grupo de gaitas Trécola; ás 13.00 horas, a Banda de Música de Vilaboa actuará no xardín e ofreceranse concertos das distintas agrupacións polas prazas da vila. Ás 16.30 horas chegarán os San Juerguines e a Festa da Auga. A partir das 22.30 horas, a noite estará protagonizada pola Orquestra Capitol e Discomóbil Karamelo.
O domingo 16 comezará ás 11.00 horas coa Banda de Música de Noia, a Banda de Gaitas de Calo, Os Caraveiros, grupos de gaitas Xiada, Os Arghalleiros e Queicoa. Ás 11.30 horas terá lugar a entrada da Brilat e o desfile e, ás 12.00 horas, a benvida á Brilat con arrancadeira no Cantón da Leña, ademais dunha nova saída dos xigantes e cabezudos co grupo de gaitas Trécola. Ás 13.00 horas actuará a Banda de Música de Noia no xardín e, ás 18.30 horas, celebrarase a misa solemne, procesión da Virxe do Carme e ofrenda floral. A partir das 22.30 horas será a quenda de Panorama City e Chocolate Disco Móbil.
O luns 17 abrirase ás 11.00 horas coa Banda de Música de Calo, a Banda de Gaitas Herba Grileira, grupos de gaitas Xiada, Os Caraveiros, Ar de Loureda e Os Arghalleiros, ademais do Tren Pincheiro. Ás 12.00 horas abrirá Pincheirolandia; ás 12.30 horas sairán os xigantes e cabezudos co grupo de gaitas Trécola e, ás 13.00 horas, terá lugar a Festa da Espuma e o concerto da Banda de Música de Calo no xardín. Ás 13.30 horas está previsto o percorrido dos distintos grupos de gaitas. Pincheirolandia retomará a actividade ás 17.00 horas e, ás 20.00 horas, haberá unha nova saída dos xigantes e cabezudos acompañados polos grupos de gaitas. Ás 22.30 horas actuará Treixadura e, ás 00.30 horas, terá lugar a gran queima de fogos artificiais e combate naval. Despois dos fogos continuará a música con Chocolate Disco Móbil.
Para pechar a presentación, Patricia Lojo animou á veciñanza e ás persoas que visiten A Pobra a saír á rúa, participar nas diferentes propostas e gozar destes días, mantendo vivo o carácter propio do Carme dos Pincheiros e unha parte moi querida da historia da vila.
