A Unión de Cidadáns Independentes (UCIN Galicia), a través do seu coordinador autonómico, José Luis Calo, criticou a política da Xunta en materia de prevención de incendios tralo lume rexistrado nas marxes da AP-9 á altura de Padrón, este xoves 23 de xullo pola tarde, que obrigou a mobilizar un importante operativo de emerxencias e, segundo UCIN, “puxo en risco a seguridade dos condutores”. Desde UCIN Galicia din que “levamos anos advertindo da falta de limpeza e mantemento das franxas de seguridade nas principais vías de comunicación, especialmente nas estradas de titularidade autonómica, onde, aseguran, a vexetación acumulada converte calquera foco nun grave perigo”.
O coordinador de UCIN Galicia engadiu: “Non abonda con felicitar aos servizos de extinción cando o lume xa está activo. O que hai que facer é evitar que eses incendios se produzan. Cada incendio que puido evitarse é tamén unha responsabilidade política.”, afirmou José Luis Calo, debullando algunhas reclamacións concretas, como un plan permanente de limpeza das marxes das estradas durante todo o ano, o mantemento efectivo das faixas de protección nas autovías e estradas dependentes da Xunta, as inspeccións periódicas para eliminar maleza, silvas e biomasa acumulada, unha maior coordinación entre administracións para reducir o risco de propagación dos incendios, maior investimento en prevención sen limitar os recursos á campaña estival, e unha maior transparencia sobre os contratos de mantemento e a execución real dos traballos.
Segundo UCIN Galicia, o incendio rexistrado na AP-9 evidencia que a prevención segue sendo a gran materia pendente, advertindo de que “nas estradas autonómicas a situación é aínda máis preocupante debido á falta de conservación de numerosos tramos”.
